ILOILO CITY- Nabali gid ang tuo nga tiil kag nakaagom sang mga pilas sa lawas ang isa ka lalaki matapos matampukan ini sang duta nga ila ginakutkot sa kilid sang dalan sa Brgy. Malag-it, Calinog, Iloilo.
Ang biktima amo si Alyas Jey, 29, residente sang Kalinga, Passi City apang temporaryo nga nagatinir sa Brgy. Garangan, Calinog, Iloilo.
Sa interview sang Bombo Radyo kay Punong Barangay Jechris Cerbania, iya ginpahayag nga samtang nagakutkot sang duta ang biktima kaupod ang anom ka iban pa nga mga indibidwal,naghuyang ang ibabaw nga porsyon sang ginakutkot nila nga duta rason nga natiphag kag natampukan ang biktima.
Gilayon man nga ginbululigan ini sang iya kaupdanan kag sa pagresponde man sang Municipal Disaster Risk Reduction Management Office sang Calinog, narescue ang lalaki kag madasig nga gindala sa ospital para sa nagakaigo nga pagpabulong.
