ILOILO CITY- Hugot nga ginpanginwala ni Iloilo City Councilor Ely Estante nga kabahin ini sang ginaluto nga grupo nga magabunggo sa partido ni Mayor Jerry Treñas sa masunod nga eleksyon.
Base sa impormasyon, si Estante ang ginaduso nga magbunggo sa magapare-elect nga si Vice Mayor Jeffrey Ganzon.
Sa interview sang Bombo Radyo kay Councilor Ely Estante, iya ginpahayag nga indi na ini magpadalagan sa ano man nga mataas nga posisyon sa eleksyon sa 2025.
Suno kay Estante, wala man sang may nagtanyag sa iya nga magpadalagan sa pagka-bise alkalde kag bisan pa nga may ara, nanindugan ini nga indi gid niya ini pagbatunon.
Dugang ni Estante, wala man sang rason nga kontrahon sini sa Ganzon sa pagka-bise alkalde.
Suno pa sa iya, gamiton na lang niya ang nabilin nga mga binulan sa iya termino sa pagsuporta kay Mayor Treñas.
