Nagpanawagan si Pope Francis sa Israel kag Iran nga indi na maghimo sang dugang nga mga tikang nga mahimo makapadaku pa sang gamo nga ginakaulamiran sang duha ka pungsod.
Sa iya mensahe sa St. Peter’s Square, Abril 14, ginsiling sang 87-anyos nga Santo Papa nga nahangawa siya kag nasakitan sa report nga may mga drone kag missile na nga ginpalupad ang Iran sa Israel bilang balos sa airstrike sang Israel Defense Forces sa Iranian consulate sa Syria.
Sa report sang Israel Defense Forces, yara sa 300 ka mga drones kag cruise kag ballistic missiles ang ginpalupad sang Iran pasado 11:00 sa gab-i sang Sabado (oras sa Israel), apang 99% diri ang ila nasagang. Nagpaandam naman ang Iran nga mas daku ang ila atake pananglitan magbalos pa gid ang Tel Aviv.
“I make a heartfelt appeal for a halt to any action that could fuel a spiral of violence with the risk of dragging the Middle East into an even greater conflict,” pahayag naman ni Pope Francis.
Sa amo man nga event, nag-apelar man si Pope Francis sang ceasefire sa Gaza agud mapahanugutan ang pagsulod sang ayuda amo man ang paghilway sa mga bihag.
“Enough war, enough attacks, enough violence. Yes to dialogue, yes to peace,” dugang sini.#
Vatican Media/Handout via REUTERS
