Nagapadayon sa pagsangkad ang mga protesta sa mga dalagku nga unibersidad sa Estados Unidos sang Amerika agud nga ipakita ang suporta sa mga Palestinians kag pamatukan ang pagpang-atake sang Israel sa Gaza.
May pila ka mga eskwelahan nga nagtawag pa sang mga pulis agud nga pahalinon ang demonstrators apang pila naman sa mga estudyante ang nangisog sa pagdeklarar nga handa sila magbaton sang kunsekwensya sang ila kawsa.
Sa Washington University sa St. Louis, masobra 80 ang gin-aresto kadungan sang ila demonstrasyon sang weekend lakip na ang Green Party presidential candidate.
Sa California, nagresponde man ang mga pulis sa protesta nga ginpatigayon sang gab-i sa University of Southern California.
Sa California State Polytechnic University, Humboldt sa Arcata, California, napilitan naman ang mga opisyal nga magsirado para sa nabilin nga inadlaw sa semester kag magpatuman na lamang sang remote instruction bangud indi maghalin ang mga protesters sa sulod sang campus buildings.
Sa Columbia University sa New York nga amo ang epicenter sang mga demonstrasyon, nagamandu ang protesters nga utdon na ang kaangtanan sang eskwelahan sa academic institutions sa Israel bangud sa padayon nga pagpamomba sang Israeli military sa Gaza.
Sa Middle East, naghingyo na si Palestinian President Abbas sa Estados Unidos nga magbulig agud nga tapnaon ang plano sang Israel nga dayunon ang invasion sa syudad sang Rafah kun sa diin 66 ka mga tawo na ang patay sa nagligad nga 24 ka oras.
May mga indikasyon naman nga nabaton ang Israeli government nga ginakonsiderar sang International Criminal Court (ICC) prosecutor ang pagpaguwa sang arrest warrants para sa Israeli officials lakip kay Israeli Prime Minister Benjamin Netanyahu bangud sa padayon nga kalakasan sa Gaza.#
[Frederic J. Brown/AFP]
