Nagdangat na sa malapit 50 ka mga tawo ang napatay sa north-western Nakuru county sang Kenya bangud sa pag-collapse sang dam nga nagdugang sa casualties nga dala sang lapnagon na nga baha sa lugar.
Na-report ang casualties sa Mai Mahiu nga 60 kilometros ang kalayuon halin sa kapital nga Nairobi.
Suno kay Nakuru governor Susan Kihika, ang pagbaha sa rehiyon nga nagsugod pa sang nagligad nga semana ang ginpalala pa sang pagkaguba sang Old Kijabe Dam nga rason kun nga nagbinaliskad ang mga salakyan, nagkalagabot ang mga puno sang kahoy, kag naanod pati ang mga balay.
42 ka mga lawas ang na-recover kasunod sang insidente lakip ang 17 ka mga menor de edad.
Padayon naman ang pagkutkot sang rescue teams sa mga lunang agud makapangita sang dugang nga survivors apang may una na paandam nga ginpaguwa nga posible madugangan pa ang numero sang casualties.
Nahibaluan nga sinemana na nga mabaskog ang ulan kag nagabaha sa Kenya kun sa diin may nauna na nga 100 nga napatay kag nagkalaguba naman ang mga dalan kag taytay.
Masobra sa 200,000 ka mga tawo ang apektado bangud sini. Gin-postpone man ang natalana nga pagbukas sang primary kag secondary schools sa bag-o nga term. Mangin ang international airport sa Nairobi ang nasul-ob man sang baha sang weekend kag ginpang-divert ang pila sa flights.#
