Ginkumpirma sang militar nga ang isa sa duha ka mga rebelde nga napatay sa engkwentro sa boundary sang Barangay Cawilihan kag Barangay Bucari, Leon, Iloilo amo ang high-ranking leader sang Communist Terrorist Group sa Western Visayas.
Ini amo si Nahum Camariosa alias Rodel/Bebong, squad leader sang Southern Panay Front (SPF), Komiteng Rehiyon – Panay kag residente sang amo man nga banwa.
Sa interview sang Bombo Radyo kay Lieutenant Colonel J-Jay Javines, spokesperson sang 3rd Infantry Division sang Philippine Army, iya ginpahayag nga ginabanta naga-edad na sang 60-anyos si Camariosa, madugay na sa hublag, kag malawig naman nga wanted bangud sa sampaw-sampaw nga mga kaso-kriminal kaangay sang multiple murder, frustrated murder, robbery in band with frustrated homicide and damage to property, kag robbery with serious physical injuries.
May yara man ini sang patong sa ulo nga nagdangat sa P150,000.
Suno pa sa militar, involved man si Camariosa sa mga engkwentro subong nga tuig sa Iloilo lakip na sa natabo sa San Joaquin sang Pebrero 28 kun sa diin napatay man ang iya anak nga si Rena Rhea kag tatlo sa ila kaupdanan nga rebelde.
Magluwas diri, yara man ini sang natabo ang serye sang engkwentro sa Miagao, Iloilo sang Marso 4.
Pahayag pa ni Javines, ang isa ka napatay sa engkwentro kahapon amo si alias JunJun/Cedrick, myembro sang Regional Sentro de Gravidad kag residente sang Barangay Bad-as, San Joaquin, Iloilo.
Nalakip man sa nakumpiskar sang tropa sang militar amo ang mga mataas nga kalibre sang armas nga amo ang tatlo ka M16 rifles, isa ka M14 rifle, isa ka AK-47 rifle, kag isa ka anti-personnel mine.
Na-report man sang Philippine Army nga may iban pa nga rebelde nga napilasan kag mahimo gid gilayon ma-report sa otoridad kun masiplatan ini sa kaiping nga mga lugar agud nga mahatagan man sang nagakaigu nga bulig.
Nahibaluan nga magkasunod ang natabo nga engkwentro kahapon kun sa diin ang una amo ang sa boundary sang Barangay Bucari kag Cawilihan 7:30 sa aga kag ginsundan sa amo man nga lugar sang dies minutos antes ang alas dies sang aga.
Ang nakaatubang sang militar ang ginapatihan nga tingob nga pwersa sang Regional Sentro de Gravidad kag mga parte pa sang na-dismantle na nga Southern Panay Front, Komiteng Rehiyon Panay.
