ILOILO CITY- Gin-detain sang Ukraine ang duha ka security officials nga ginaalegar nga involved sa Russian plot agud i- assassinate si President Volodymyr Zelensky.
Suno sa Ukraine’s Prosecutor General’s office, duha ka mga colonels sa government protection unit sang Ukraine ang ginaakusahan nga nagapatigayon sang subversive activities batok sa Ukraine kabaylo sang dako nga kwarta.
Ang duha ka mga colonels ang pareho nga ginpasakaan sang kaso nga treason kag ang isa ang may dugang nga kaso bangud sa pagpreparar sang isa ka akto sang terorismo.
Suno sa prosecutor, isa sa mga suspects ang nakabaton sang duha ka drones kag ammunition halin sa state security service sang Russia kag plano nga isaylo ini sa lain nga kahimbon agud magpatigayon sang isa ka pagpalupok.
Suno sa imbestigasyon, magluwas sa pag- assassinate kay Zelensky, target man ang iban nga senior Ukrainian officials, kaangay sang pinuno sang state security service nga si Vasyl Maliuk, kag head of the Defence Intelligence of Ukraine nga si Kyrylo Budanov.
Isa sa plano amo ang pagpangita sang tawo sa Ukrainian military nga malapit sa security group sang Presidente kag amo ang mangamot sa pag-hostage kag pagpatay sa iya.
Nahibaluan nga pila ka beses naman nga gintuyo nga i-assassinate si Zelensky humalin sang gin-atake sang Russia ang Ukraine sang Pebrero 2022.
