Gin-report sang World Health Organization (WHO) nga tatlo ka adlaw na lang ang nabilin antes dalayon nga mahubas ang fuel nga amo ang ginagamit agud magpadayon ang health services sa Gaza sa tunga sang padayon nga pag-atake sang Israel.
Suno sa organisasyon, wala ginpasulod ang gindul-ong nga suplay kahapon lakip na ang iban nga humanitarian aid.
May pila man nga nag-untat na gid sa operasyon kaangay sang Abu Yousef al-Najjar Hospital sa Rafah nga isa sa tatlo lamang ka mga ospital sa amo nga syudad.
Ang iban sa ila nga equipment ang ginpangsaylo na sa field hospitals.
Nahibaluan nga yara na sa 50,000 ka tawo ang nagbiya sa southern Gaza city sa nagligad nga duha ka adlaw bangud sa mandu sang Israeli army nga magbakwit bangud magapatigayon sila sang ground offensive.
Sa bahin sang Estados Unidos sang Amerika, ginkumpirma ni Defense Secretary Lloyd Austin nga gin-untat anay sang pungsod ang shipment sang bomba sa Israel bangud ginakahangaw-an nga gamiton ini sa ila nga ground operation sa Rafah bisan pa nga madamo ang sibilyan sa amo nga lugar.#
REUTERS/ Mahmoud Issa/File photo
