CALINOG, ILOILO – Nag-umpisa na ang National Irrigation Administration sa pagpatuman sang plugging sa Jalaur River Multi-Purpose Project Stage II sa Calinog, Iloilo.
Sa interview sang Bombo Radyo kay Steve Cordero, Watershed Management Chief kag spokesperson sang nasambit nga proyekto, iya ginpahayag nga ang plugging amo ang pagpasirado sang diversion tunnels agud maka-impound ukon makatipon sang tubig ang dam.
Suno kay Cordero, pinaagi sini, ang tubig halin sa suba ang magalabay sa waterway agud mapuno ang reservoir sang dam.
Sa pag-umpisa sang plugging, lakip sa mga ginadumilian nga buluhaton amo ang mga masunod:
1.Pagpatukod sang mga istruktura, temporaryo man ukon permanente, kaangay sang balay, kag istruktura nga pangabuhian kaangay sang tyangge, tangkal, fishpond kag iban pa sa sulod sang reservoir kag buffer zone.
2.Pagkaingin, pagpanguma kag pagtanum sa sulod sang reservoir kag buffer zone.
3.Mga hilikuton kaangay sang paglagaw, paglangoy sa suba, pagpamunit kag pangisda, mga ritwal kag iban pa sa lugar nga masul-ob sang tubig.
4.Pagpangharap ukon pagbuhi sang kasapatan sa mga lugar nga masul-ob sang tubig.
Target naman nga matapos ang proyekto sa katapusan sang tuig 2025.
