Gin-report sang U.N. food agency nga masobra na sa 300 ka tawo ang napatay kag masobra 1,000 nga mga balay ang naguba bangud sang flash floods kadungan sang indi kinaandan nga pag-ulan sa Afghanistan.
Sunp pa sa World Food Program, nagapanagtag ini sang biscuits sa survivors sang baha nga nagluntad sa amo nga pungsod sa nagligad nga sinemana lakip na ang sa northern province sang Baghlan. Sa kaiping nga probinsya sang Takhar, yara man sa 20 ka mga tawo ang napatay.
Ginmanduan na sang Taliban ang gobyerno nga maggamit sang tanan nga available nga resources agud nga ma-rescue ang mga tawo, madala sa ospital ang mga may samad, kag ma-recover ang iban pa nga mga bangkay.
Sa latest statement sang Taliban Defense Ministry, nabakwit na ang mga tawo sa Baghlan samtang nadala naman ang 100 nga mga tawo nga napilasan sa military hospitals sa rehiyon.
Base sa mga eksperto, ang Afghanistan ang isa sa pinaka-delikado nga mga nasyon sa kalibutan kun epekto sang climate change ang pagahambalan.
Isa man ini sa pinakapigado nga mga nasyon sa kalibutan nga naglala pa sang nag-atras na ang pwerse sang US-lead coalition kag nagbulos sa pagkontrol ang Taliban sang 2021.#
(Photo: AFP)
