ILOILO CITY- Ginakabig man nga dako nga selebrasyon ang Mother’s day sa iban nga mga pungsod kaangay sang South Korea, Poland kag Sri Lanka.
Suno kay Bombo Neva Intrepedo- Kessler, international correspondent sa Poland kag isa ka iloy, ang tradisyonal nga selebrasyon sa ila lugar ang nagalakip sang paghatag sang regalo, paghimo sang card kag ginahatag ini sa mga iloy.
Pahayag ni Intrepedo Kessler, ang kabataan masami nga nagahimo,naga-decorate kag nagasulat sang laurki nga hand-made cards nga may paper flowers.
Suno pa sa iya, nagahatag gid sang tiempo ang mga eskwehalan para maghiwat sang programa para sa mga iloy,apang sa baylo nga ikaduha nga Domingo sang Mayo, kada Mayo 26 ini ginaselebrar.
Kabahin man sang tradisyon ang paghatag sang bulak nga tulips sa mga iloy.
Sa Sri Lanka naman, ginpahayag ni Bombo Priscilla Rollo Wijesooriya nga ginasuguran sang pamilya ang adlaw paagi sa pagpakita sa mga iloy sang mapinalanggaon nga mga akto, halin sa pagpreparar sang mga traditional nga mga pagkaon pakadto sa paghatag sa ila sang mga mahamot nga bulak kag handmade gifts.
Isa man sa mga ritwal nga gina-obserbar amo ang paghalad sa mga Buddhist monks.
Nagatipon ang mga pamilya sa templo kun sa diin ginahalad ang pangamuyo para sa kaayuhan kag kalipay sang mga iloy.
Kabahin man sang tradisyon ang paghatag sang bulak nga anthurium para sa mga iloy sang pamilya.
Sa South Korea, ginpahayag ni Bombo Marie Ann Casas nga sa baylo nga Mother’s Day, “Parents’ Day” ang tawag sa ila selebrasyon nga amo ang integration sang Mother’s Day kag Father’s Day.
Base sa Korean traditions, ang mga bata ang kinahanglan nga magbutang sang bulak nga carnation sa dughan sang ila ginikanan.
Sa masami, ginalauman man ang regalo kag cards halin sa kabataan.
