Nahimo nga trahedya ang isa kuntani ka malipayon nga graduation celebration matapos naaksidente ang bus sa Subang, Indonesia nga ginkamatay sang 11 ka mga tawo lakip na sang siyam ka mga estudyante.
Suno kay Bombo Ginavella Limpin Cumla, magluwas sa mga estudyante, may isa man ka maestra kag isa ka motorista nga napatay samtang pilason naman ang iban sa ila nga kaupdanan.
Ini nga bus nga may 61 ka mga pasahero ang naghalin sa isa ka resort area sa Bandung kag pabalik na kuntani sa Depok, West Java suno sa otoridad.
Padayon pa ang imbestigasyon sa rason sang insidente, apang sandig sa inisyal nga pagpangusisa sang West Java police, nadulaan sang kontrol ang amo nga bus sa dulhugon nga bahin sang area, sunod pa gid nga nagbunggo sa iban nga mga kotse kag motorsiklo antes pa ini nagbunggo sa isa pa gid ka poste.
Pahayag pa sang West Java police commissioner, 18 ka mga operasyon ang ginpatigayon sa seryoso nga mga samad nga naangkon sang iban nga mga biktima.
Nahibaluan nga ang Mayo-Hunyo amo masami ang tion sa paghiwat sang end-of-school year activities kag ini nga trip sang highschool students ang kabahin sang ila nga farewell/celebration event.#
