ILOILO CITY – Nagpanawagan ang mga jeepney operators sa Cooperative Development Authority (CDA) nga imbestigaran ang nagakatabo nga iregularidad sa mga transport cooperative.
Sa interview sang Bombo Radyo kay Nycel Abogadil, jeepney operators, iya ginpahayag nga antes ang pandemya, nagbiya sila sa Iloilo City Alliance of Operators and Drivers Transport Cooperative (ICAODTC) kag nagsaylo sa Western Visayas Transport Cooperative (WVTC).
Suno kay Abogadil, nagdumdum sila nga maayo ang pagdumala sang WVTC, apang baliskad ang natabo sa diin wala sang transparency nga nagakatabo.
Ginpahayag sini nga sa tion nga may general assembly, wala man sila ginapahambal bangud kabahin sila sang minorya sang kooperatiba.
Tungod sini, nagdedisyon na lang sila nga 33 ka mga operators nga maghalin sa kooperatiba sang Marso.
Ginpull-out naman nila ang 63 nila ka mga units.
Apang tubtob subong, ang ginareklamo nila bangud wala pa ginahatag sa ila sang WVTC ang deed of transfer kag Official Receipt – Certificate of Registration (OR-CR).
Kuntani suno sa natungdan, usisason sang CDA ang ginahimo sang mga officers sang kooperatiba.
