Nagsugtanay sanday United States President Joe Biden kag anay President Donald Trump nga mag-atubangay sa duha ka televised presidential debates nga nakatalana sa bulan sang Hunyo kag Septyembre subong nga tuig.
Naka-schedule ang una sa Hunyo 27 sa swing state sang Georgia; samtang sa Septyembre 10 naman ang ikaduha nga debate kag natalana pa nga ipaguwa ang detalye.
Nahibaluan nga ang election-year presidential debates ang kinaandan nga ginawaragwag sa nagkalain-lain nga US networks kun sa diin at least 73 million ka Americans ang naglantaw sang una nga debate sang 2020 sa tunga nanday Trump kag Biden.
Magamo man ang napilian nga schedule subong nga tuig bangud sa Hunyo 27 nga una nga match-up, ginalauman nga matapos na ang criminal hush money trial ni Trump sa New York; may mga byahe si Biden sa France kag Italy sa tunga-tunga sang Hunyo; kag matapos naman ang term sang Korte Suprema nga buot silingon, may ruling na kun bala immune si Trump sa federal prosecution kaangot sa Enero 6 nga Capitol insurrection.Ang ikaduha naman nga debate ang matabo antes ang pagsugod gid sang early voting sang kalabanan nga states.#
