Gin-evacuate na sang Estados Unidos sang Amerika ang 17 ka American doctors nga na-trap sa Gaza halin sang ginsirado na ang border sa Egypt kadungan sang pagsakop sang Israel sa Rafah.
Naghulag ang American diplomats sa embassy sa Jerusalem agud nga mapabiya ang mga doctor paagi sa Kerem Shalom tabok sa Israel.
May mga impormasyon nga may yara sang tatlo ka US citizen doctors nga kabahin man sang volunteer medical mission nga nagpili nga magpabilin sa amo nga lugar apisar wala sang kasiguruhan kun san-o sila liwat maka-tyansa nga makahalin.
Nahibaluan nga ang alagyan sa Rafah pakadto sa Egypt amo ang mayor nga ginatabukan sang mga ayuda kag mga tawo nga pasulod sa Gaza. Ginsirado ini halin sang gin-anunsyo sang Israel sang Mayo 7 nga nasakop na sini ang border post halin sa Hamas militants.
Ang closure nga ini ang ginpatuman antes ang ginapanan-aw nga full-scale Israeli invasion sa syudad sang Rafah kun sa diin minilyon ka Palestinians ang nagatinir.
Si US President Joe Biden ang una na nagsiling nga indi ini maghatag sang mga armas kag artillery shells sa Israel kun maglunsar ini sang ground offensive sa Rafah bangud possible nga madalahig ang mga sibilyan.
Apisar sini, nagsabat man si Israeli Prime Minister Benjamin Netanyahu nga magapadayon sila sa ila plano sa operasyon kag makumpleto na ini sa masunod nga sinemana. Ginapatihan sang Israel nga ang Rafah amo ang ginahukmungan sang iban pa nga katapo sang Hamas militants kag tuyo sang militar nga maubos-papas ukon mapanas ang mga ini.#
AFP / Mohammed Abed
