Nagtibusok sa kabukiran ang helicopter kun sa diin nakasakay ang presidente sang Iran kag foreign minister sang Iran.
Wala pa subong sang maathag nga detalye kun kamusta ang kondisyon ni Iranian President Ebrahim Raisi kag Foreign Minister Hossein Amirabdollahian apang gin-report nga nangin mabudlay ang rescue operation bangud sa malain nga tyempo.
Halos naputos sang gal-um ang lugar sandig sa nakit-an sa live coverage sa rescue teams nga nagpatigayon sang rescue operation.
Nahibaluan nga 2021 sang na-eleher ang 63-anyos nga si Raisi bilang president sang amo nga pungsod.
Sang natabo ang insidente, ginpahayag nga naghalin sa isa ka event agud inagurahan ang Qiz-Qalaisi Dam nga isa ka joint project kaupod sa Azerbaijan.
Suno sa state-linked media, tatlo ka helicopters ang yara sa convoy sang president kag duha lamang ang safe nga nakahugpa.
Nakapadala pa sang emergency call ang mga kaupdanan sang president nga amo ang nagahatag sang paglaum sa otoridad nga wala sang patay sa amo nga helicopter apisar pa sang insidente.
