Ginkumpirma sang Department of Migrant Workers (DMW) nga safe kag wala nasamaran ang 23 ka Pinoy seafarers nga sakay sa barko nga gin-atake sang Houthi rebel group sang weekend.
Suno sa ahensya, may nakit-an nga gamay nga damage sa barko apang nagpadayon ini sa paglayag.
Nahibaluan nga nagpalupad ang Houthis sang single anti-ship missile nga rason kun ngaa nagtaas ang tubig kag na-knockout ang propulsion kag steering sang barko nga M/T Wind nga isa ka Panamanian-flagged kag Greek-owned nga oil tanker.
Maswerte man nga gilayon nga napabalik sang crew ang suplay sang kuryente.
Base sa report sang British security firm nga Ambrey, natabo ang atake sa ginabanta 10 nautical miles southwest sang Yemeni Red Sea port city sang Mokha.
Matandaan nga sang Marso, duha ka Pinoy crew nga sakay sang MV True Confidence ang napatay bangud man sa missile attack sang Houthi rebels.
Ang sunod-sunod nga pagpang-atake sang Houthis sa mga barko sa Red Sea ang nagsugod sang Nobyembre 2023 bilang pagdampig sa Palestine nga amo naman ang gina-atake sang Israel.
Una na nagpasalig ang DMW nga nagapakig-angot ini sa international maritime authorities, shipping companies, kag local manning agencies agud mahibaluan ang status sang mga barko nga may sakay nga Filipino seafarers nga nagalabay sa high-risk areas kag war-like zones sa Red Sea kag sa Gulf Of Aden.
