Nagmandu ang pinakamataas nga korte sang United Nations (UN) nga untaton na gilayon sang Israel ang military operations sini sa Rafah — ang syudad sa Gaza kun sa diin minilyon ka Palestinians ang nagapuyo humalin sang nagtal-as sila sa ila kaugalingon nga mga puluy-an bangud sa Israel-Hamas war.
Ini nga hulag sang International Court of Justice (ICJ) nga naka-base sa The Hague ang kasunod man sang aplikasyon sang South Africa kun sa diin gin-akusahan sini ang Israel nga nagakomiter na sang genocide.
Lakip man sa ginmandu sang korte amo ang paghatag sang access sa UN body nga magakadto sa Gaza agud nga imbestigaran ang genocide nga ginaalegar nagakatabo na sa lugar. Ginsulit man sa ruling sang korte nga dapat tugutan sang Israel ang pagsulod sang basic services kag humanitarian aid para sa mga tawo sa Gaza.
Ini nga order sang World Court ang na-adoptar sang panel sang 15 ka judges sa 13-2 nga boto kag duha lamang ang nagpamatok nga amo ang Uganda kag mismo ang Israel.
Makabig nga final and binding ang desisyon sini nga korte, apang pila ka beses naman ini nga ginbalewala sang Israel bangud wala man sang enforcement powers ang top UN court.
Sa sini nga landmark ruling, nagsabat lamang ang Israel nga isa ini ka “public suicide” kag nanindugan pa ang amo nga pungsod nga wala sang bisan ano nga gahum sa kalibutan nga makatulod sa ila nga untaton ang ila operasyon.
Matandaan nga ginsuguran sang Israel ang ila nga opensiba sa Rafah halos tatlo ka semana na ang nagligad sa tuyo nga dalayon nga papason ang battalion sang Hamas sa area. Nagapati man sila nga may Israeli hostages pa sa amo nga lugar.
Ginsiling man sang UN nga masobra 800,000 Palestinians na nagbiya na sa Rafah halin sang nagsugod ang opensiba.
Ini nga atake sa Rafah ang kabahin gihapon sang pagtimalos sang Israel sa Hamas nga amo ang una nga nag-atake sa southern Israel sang Oktubre 7,2024 kun sa diin 1,200 ka tawo ang napatay lakip ang apat ka Pinoy samtang 252 naman ang ginbihag.
Sa pagbalos sang mga Israelinhon, masobra na sa 35,800 ka Palestinhon ang napatay suno sa Hamas-run health ministry apang nagapadayon gihapon tubtub subong.
