Nagpaguwa sang official statement si Senate Deputy Minority Leader Risa Hontiveros nga nagaklaro nga ang nagapadayon nga imbestigasyon sang Senado batok kay Bamban, Tarlac Mayor Alice Guo ang indi isa ka atake sa mga Filipino-Chinese ukon sa mga Pilipino nga may Chinese heritage.
“This is not an attack on Filipinos of Chinese heritage. My own maternal great-grandmother was pure Chinese,” kabahin sang statement.
Pahayag sang senadora, ang imbestigasyon ang nagatutok sa ebidensya nga nagaangot sa alcalde sa mga krimen nga naangot sa Philippine Offshore Gaming Operators (POGOs).
Ginplastar man ni Hontiveros nga pila sa mga maathag nga ebidensya batok kay Guo amo mismo ang iya kaugalingon nga mga statements.
“Huwag din nating kalimutan na ang POGO sa munisipalidad ni Mayor ay may ‘di umanong hacking at surveillance activities. Considering China’s aggressive influence operations around the world, it would be remiss of the Senate not to look into this angle,” suno kay Hontiveros.
Indi ini witch-hunting kag pulitika suno pa sa senadora kundi isyu nga naga-involve sang national security, criminal activities, accountability sa public service, rights and welfare sang kababainhan kag kabataan, kag ang structural failure sang system sa Pilipinas nga ma-regulate ang POGO bilang isa ka business model.
Gindugang pa sini nga sa tunga sini tanan, indi gihapon ma-justify kag mabaton ang racism, xenophobia kag Sinophobia. Bisan ano pa ang heritage suno sa iya, ang tanan nga law-abiding citizens ang indi dapat pagpaulanan sang kaugot kag diskriminasyon.
“Sa gitna ng lahat ng ito, inuulit ko ang paalala ko na hindi kailanman magiging katanggap-tanggap ang racism, xenophobia at Sinophobia. Regardless of our heritage, all law-abiding citizens should not be the subject of hate and discrimination,” kabahin sang statement.
Nahibaluan nga duha ka Senate panels ang nagapatigayon sang joint investigation sa ginaalegar nga kaangtanan ni Guo sa POGO sa Bamban, apang na-agaw ang atensyon sang tanan sang nagguwa ang reports nga naglutaw lang si Guo sang 2022 elections, wala ini sang madumduman sa mga personal nga detalye sa iya kabuhi, late ang registration sang iya nga live birth, tubtub nga nagguwa ang pagpangduha-duha nga posible isa ka Chinese spy ukon asset ang alkalde.
Sa iya pag-atubang sa Senado kag media, sulit-sulit naman nga nagdepensa si Guo kag nagsiling nga indi siya Chinese spy ukon asset kundi isa ka Filipino citizen.
