ILOILO CITY- Gin-akusahan sang opposition parties sang Papua New Guinea si Prime Minister James Marape nga ‘missing in action’ sa tunga sang recovery effort matapos ang makamamatay nga landslides nga nag-igo sa Enga Province sa amo nga pungsod.
Ang landslide nag-igo sa remote village sang Kaokalam, kapin 600 kilometers ang kalayuon sa northwest sang capital nga Port Moresby.
Una na nagpagwa sang written statement ang Prime Minister nga nagapabutyag sang iya pagpakig-unong sa mga apektado nga pamilya.
Suno kay Bombo Remegildo Luzon, international correspondent sa Port Moresby, Papua New Guinea,, ginakwestiyon sang oposisyon kun ngaa wala ini nagpakita sa publiko agud maghatag sang pahayag tuhoy sa trahedya.
Wala man ini naghiwat sang press conference ukon nagbisita sa amo nga isolated site.
Una na ginpahayag sang Papua New Guinea government nga masobra sa 2,000 ka mga tawo ang natabunan sang duta kag mga bato sa landslide.
Apang pila ka gid lamang ka mga bangkay ang narekober.
Ang kalaparon sang landslide area ang ginabanta apat ka mga football fields rason nga nabudlayan ang mga humanitarian rescuers.
Nagpahayag naman sang simpatiya ang mga world leaders kaangay nanday King Charles, United States President Joe Biden kag ang pinuno sang United Nations para sa ginaatubang sang nasambit nga nasyon.
