ILOILO CITY- Ginaimbestigaaran na sang Bangko Sentral ng Pilipinas (BSP) ang ginaalegar nga ghost employees sa Monetary Board sini.
Base sa impormasyon, nag-resign na sang Marso ang apat ka mga empleyado kag isa ka immediate supervisor nga ginaalegar nga involved sa kontrobersiya.
Suno sa Bangko Sentral ng Pilipinas, nagapatigayon sila sang post-incident review agud masiguro nga indi na ini matabo liwat.
Ginpasiguro man sang Bangko Sentral ng Pilipinas nga bawion sini ang sweldo nga ginhatag sa ginaalegar nga mga empleyado.
Una na naglunsar ang Office of the General Counsel sang imbestigasyon sa insidente sang Oktubre 3 kasunod sang reports nga may mga staff sa opisina sang duha ka Monetary Board members nga wala na naga-duty apang nagabaton gihapon sang sweldo.
