ILOILO CITY- Nagtukod ang Partido Federal ng Pilipinas sang steering committee nga amo ang magahibalo kun sin-o ang maupod sa senatorial line- up sang partido.
Sa interview sang Bombo Radyo kay South Cotabato Governor Reynaldo Tamayo Jr., National President sang partido, iya ginpahayag nga ang steering committee amo ang in-charge sa pagpili sang mga tuyo mangin senador kag mapadalagan sa 2025 midterm elections.
Suno kay Tamayo, may ara pa sang iban nga mga partido nga makig-alyansa sa Partido Federal ng Pilipinas.
Sa subong, duha na ka national parties ang nakig-alyansa sa Partido Federal ng Pilipinas kag ini amo ang Nationalist Peoples Coalition kag Lakas-CMD.
Indi pa mapaguwa ni Gov. Tamayo ang mga partido nga naga istorya sa Partido Federal ng Pilipinas bangud wala pa sang resulta sa sini nga mga diskusyon.
Apang antes ang bulan sang Septyembre pahayag niya pat-od may yara na sang listahan sang senatoriables.
May kaangtanan naman sa posibilidad sa bahin sang Liberal Party nga mag-alyansa sa ila, ginpahayag niya nga temprano pa para istoryahan ini.
