Kasuhan sang Philippine National Police (PNP) ang anum ka supporters ni Kingdom of Jesus Christ leader Pastor Apollo Quiboloy nga nagtuyo nga sakiton ang mga pulis sang gin-serbe na ang warrants of arrest batok sa self-proclaimed Appointed Son of God kag sa lima pa sini ka kaupdanan sa Davao City sang nagligad nga Lunes.
Suno kay PNP Spokesperson and Public Information Chief Col. Jean Fajardo, apisar nga nagpugong ang mga pulis kag nagsunod gid sa maximum tolerance kadungan sang operasyon, wala nakuntento ang iban nga tawo sa pagbalabag sa alagyan kag naggamit pa sang water cannon agud mabumbahan sang tubig ang pulis.
Wala nagbalos kag wala man naghulag ang mga police personnel kag naghulat lamang nga maubos ang tubig.
Gindugang man sini nga may supporters pa nga naggamit sang mga menor de edad agud balabagan ang mga pulis nga buot mag-serbe sang warrant sa Glory Mountain.
Sang gin-imbitar naman ang anum ka kalalakihan sa police station, gin-alegar man nga gin-atake man sang mga ini ang kapulisan kag na-recover pa ang 17 ka mga binangon kag isa ka marble gun.
Sa pihak sini tanan, ginsiling sang PNP nga wala sang major injuries nga na-report kag wala nagbalos ang mga pulis.
Kaso nga obstruction of justice ang ipasaka sa anum suno pa kay Fajardo.
Nagpanginwala man si Fajardo nga may “overkill”kag sobra-sobra nga paggamit sang pwersa sa pag-serbe sang warrant — bagay nga nakasaad sa statement ni anay Presidente Rodrigo Duterte sang ginkondena sini ang ginhimo sang mga pulis.
Si Quiboloy kag ang iya supporters ang una naman nagpanginwala sa mga alegasyon sang sexual abuse kag trafficking kag ila man ginapanindugan nga ini ang kahimuan sang ila anay mga myembro nga nagadumot sa religious group.
Ginpanginwala man sini ang alegasyon sang rape, bangud suno sa iya, naga-ilinaway pa gani ang mga babaye nga sumulunod para nga makaupod sa iya.
Wanted si Quiboloy bangud sa child abuse, sexual abuse kag qualified trafficking cases nga na-file sa korte sa Davao kag Pasig.
