Nagtaliwan na ang isa sa ginakabig greatest basketball players of all-time kag National Basketball Association (NBA) legend nga si Jerry West nga amo ang inspirasyon sa silhouette sa logo sang liga.
Ginkumpirma ini sang Los Angeles Clippers kun sa diin naga-trabaho anay ang iconic Hall of Famer bilang executive.
Naga-edad na sang 86-anyos ang nasambit nga 14-time NBA all-star sang ginbawian ini sang kabuhi sa tupad sang iya asawa nga si Karen.
Nagpaguwa naman sang statement si NBA commissioner Adam Silver nga nagalaragway kay West nga isa ka “basketball genius” kag “defining figure” sa liga sa sulod sang masobra anum ka dekada.
Siya ang labing-una nga Finals MVP sang liga kag bangud sa iya kalidad bilang player, kilala ini sang basketball fans bilang si ‘Mr. Clutch.’
Si West nga isa ka shooting guard amo ang nagpanguna agud makatapak ang Los Angeles Lakers sa siyam ka NBA Finals kag mahakwat man ang isa ka championship trophy.
Sang 1969, nahimo sini ang record bilang nagaisahanon lamang nga player tubtub subong nga nahingadlan nga Most Valuable Player sa championship series apisar nalutos ang iya team sa serye.
Sang 1980, nabutang man ini sa Basketball Hall of Fame kag natalana nga i-enshrine liwat subong nga tuig bilang isa ka contributor.
