Naghimo sang maragtas si Pope Francis bilang labing-una nga Santo Papa nga nag-upod sa world leaders sa Group of Seven ukon G7 summit.
Nag-sentro ang mensahe sang Santo Papa sa paandam nga indi dapat pagtugutan ang Artificial Intelligence (AI) nga malabawan ang humanity.
Suno kay Pope Francis, ang AI nagarepresentar sang “epochal transformation” para sa mga tawo, apang kinahanglan gihapon nga id-idon gid ang paglantaw kag pagbantay sa sini nga teknolohiya agud mapreserba ang kabuhi kag dignidad sang tawo.
“No machine should ever choose to take the life of a human being. We would condemn humanity to a future without hope if we took away people’s ability to make decisions about themselves and their lives, by dooming them to depend on the choices of machines,” kabahin sang na-translate nga mensahe sang Santo Papa.
Ginsiling sini nga maka-inspire matuod sang excitement ang AI kag mapasangkad ang access sa kaalam kag ihibalo sa kalibutan, apang makadala man ini sang daku nga inhustisya sa tunga sang advanced kag developing nations ukon sa tunga naman sang dominant kag oppressed social classes.
Matandaan nga isa man ang Santo Papa sa nangin biktima sang AI sang nagligad sang naglapta ang iya deepfake images nga nagasuksok sang jacket kag may crucifix nga gintawag sang iban nga “Balenciaga Pope” — litrato nga nakaangkon sang minilyon ka reaksyon kag ginpatihan sang iban nga matuod.
“It could bring with it a greater injustice between advanced and developing nations or between dominant and oppressed social classes. It is up to everyone to make good use of (AI) but the onus is on politics to create the conditions for such good use to be possible and fruitful,” pahayag sini.
Ang G7 summit amo ang pagtilipon sang mga lider sang United States, Germany, Britain, France, Italy, Canada kag Japan.
Gin-imbitar man sang summit host nga si Italian Prime Minister Giorgia Meloni ang 10 ka iban pa nga mga nasyon agud mag-intra sa dikusyon lakip na ang prime minister sang India kag mga presidente sang Turkey kag Kenya.
Sa pagsulod pa lamang sang Santo Papa, mainit ini nga gin-abi-abi sang kaangay man niya nga Argentine nga si President Javier Milei, ginhakos ni King Abdullah sang Jordan, ginhalukan ni Canadian Prime Minister Justin Trudeau, kag nangin malawig man ang ila istorya ni U.S. President Joe Biden nga isa man ka Katoliko.#
