ILOILO CITY- Ginkumpirma sang Armed Forces of the Philippines nga nautdan gid sang tudlo ang isa ka Philippine Navy servicemember sa natabo nga bungguanay sang Chinese ship kag Filipino vessel nga nagapatigayon sang rotation kag resupply mission sa Ayungin Shoal.
Suno sa Armed Forces of the Philippines, pito tanan ka servicemembers ang nakaangkon sang injury sa amo nga insidente.
Ginpahayag ni AFP Public Affairs Office chief Colonel Xerxes Trinidad nga ang servicemember ang hilway nga na- evacuate kag nakabaton sang madasig nga medical treatment kasunod sang hungod nga pagbunggo sang China Coast Guard sa barko sang Pilipinas.
Suno naman kay AFP Chief of Staff General Romeo Brawner, wala sang kinamatarung ukon legal nga otoridad ang China Coast Guard nga magpasilabot sa lehitimo nga operasyon ukon mangguba sang assets sa sulod sang Exclusive Economic Zone (EEZ) sang pungsod.
Pahayag pa ni Brawner, ini nga agresibo kag delikado nga tikang sang China ang maathag nga paglapas sa international maritime law, Philippine sovereignty, kag sovereign rights.
Dugang sang AFP chief, nagapabilin sila nga committed sa pagpakigbato sa rule of law kag maga- collaborate sa international partners agud masiguro ang kalinong kag katawhay sa bilog nga West Philippine Sea kag Indo-Pacific Region.
Ang insidente ang pinakauna nga na- report nga collision sa tunga sang Philippine kag Chinese vessels humali sang ginpatuman sang China ang administrative law enforcement procedure nga nagamando sa pag-aresto sa “foreign” vessels nga nagasulod sa ila ginaangkon nga teritoryo.
