Ginklaro sang National Food Authority (NFA) nga sa Metro Manila kag sa kaiping nga mga probinsya una iga-lunsar ang programa sang gobyerno nga magabaligya sang daan apang maayo pa man nga bugas sa presyo nga P29 kada kilo.
Suno kay NFA administrator Larry Lacson, intensyon man sang ahensya nga iimplementar ini sa bilog nga pungsod apang matabo ang pilot program sa Kadiwa centers sa amo nga area.
Ini nga programa nga ginatawag nga ‘Bigas 29’ ang mangin limitado lamang para sa vulnerable sector kaangay sa mga benepisyaryo sang conditional cash transfer program, persons with disabilities, senior citizens kag solo parents.
Una na nga ginpahayag sang Department of Agriculture (DA) nga ini nga programa ang ginalauman nga makabulig sa 6.9 million households ukon sa 34 million ka mga indibidwal.
Ginpasalig man sang NFA nga bisan daan na ang bugas, maayo pa ang kalidad sini kag napaidalom sa husto nga inspeksyon ukon sa laboratory and sensory test sang ahensya.
Ini nga aging stocks amo ang bugas nga natago na sa sulod sang tatlo ka bulan kag palay nga na-tago man sa sulod sang anum ka bulan.
Gindula man ni DA Spokesperson Arnel de Mesa ang kahangawa sang publiko bangud sa kalidad sang bugas: “Actually, magagandang klase ito na bigas kasi matandaan natin ang NFA, ang bigas niya ay galing doon sa locally-procured palay… na magaganda iyong mga palay. Actually iyong bigas, ang kagandahan niyan, habang tumatagal lalong sumasarap at nagiging mas good quality lalo na iyong up to one year.”
Gina-address na subong sang DA ang logistical, administrative, kag financial concerns para sa maayo nga rollout sini nga programa sa masunod nga bulan.
