Ginkumpirma sang Philippine Space Agency (PhilSA) nga napalupad na sang People’s Republic of China ang rocket sini nga “Long March 7A.”
Natabo ang rocket launch sa Wenchang Spacecraft Launch Site sa Wenchang, Hainan 7:57 kagab-i, Hunyo 29.
Nagpaandam man ang ahensya nga posible magtupa ang debris sang rocket sa identified drop zones nga ginabanta 75 NM (nautical miles) halin sa Burgos, Ilocos Norte kag 126 NM halin sa Sta. Ana, Cagayan.
Nagpahanumdom man ang ahensya sa publiko nga ipahibalo gilayon sa local authorities kun may makit-an nga makaduluda nga debris.
Gin-athag man sang PhilSa nga bisan wala ginalauman nga magtupa ang debris sa duta ukon sa mga lugar nga ginapuy-an sang mga tawo, may potensyal gihapon nga risgo nga dala ini sa mga barko, eroplano, mga sakayan sa pagpangisda kag iban pa nga vessels nga yara sa designated drop zones.
May posibilidad man nga maglutaw ang debris sa dagat kag maanod padulong sa baybayon. Ginapaandaman man ang mga tawo nga indi ini pagtandugon bangud sa possible nabilin nga toxic substances kaangay sang rocket fuel.
Napahibalo naman ang mga detalye sa rocket drop zone paagi sa Notice to Airmen (NOTAM) bilang paandam sang “aerospace flight activity.”
