Padayunon sang Armed Forces of the Philippines (AFP) ang regular rotation and resupply (RORE) missions sa West Philippine Sea apisar sang sulit-sulit nga nagakatabo nga pagpang-harass sang China.
Suno kay AFP Chief-of-Staff Romeo Brawner Jr., responsibilidad nila nga maghatag sang suplay sa tropa sang militar nga naka-estasyon sa West Philippine Sea lakip na sa BRP Sierra Madre sa Ayungin Shoal kag sa Pagasa Island.
Magluwas nga ginahimo lang nila ang ila obligasyon suno kay Brawner, isa ini ka legal operation nga ginahimo sang militar sa sulod sang
exclusive economic zone (EEZ) sang Pilipinas.
“So definitely, we will continue with our resupply mission. It is our responsibility, it is our obligation, and it is a legal operation, legal military operation that we are doing in our exclusive economic zone,” suno kay Brawner.
Indi lamang RORE missions ang magapadayon suno sa natungdan kundi mangin ang pagpatrolya agud maprotektahan ang mga manugpangisda nga Pinoy amo man ang resources nga yara sa amo nga kadagatan.
“So talagang tuloy-tuloy lang yung gagawin nating missions in the West Philippine Sea, whether it is RORE, or maritime patrols, or protecting our fisherfolks, protecting our resources, gagawin po natin lahat ‘yan,” dugang sini.
Ini ang latest statement sang militar makaligad ang halos duha na ka semana sang natabo ang insidente sa Ayungin kun sa diin ginbanggaan sang China Coast Guard (CCG) ang mga Pilipino, ginbuslutan kag ginguyod ang mga sakayan, gin-guba ang pila sa equipment, tubtub nga nautdan pa sang tudlo ang isa Philippine Navy personnel nga natalana kuntani nga magkadto sa BRP Sierra Madre agud magbulos sa tropa nga naka-estasyon sa amo nga warship.
Nagpanawagan man si Brawner sa publiko nga mangin vigilante batok sa mga nagalapta nga misinformation kaangot sa tension sa West Philippine Sea.
Wala sang dapat kabalak-an suno sa militar bangud ginahimo sang Pilipinas ang tanan agud nga indi maglab-ot sa gyera ang amo nga tension. Suno kay Brawner, base man ini sa mandu ni President Ferdinand Marcos Jr. sa militar nga magpabilin nga diplomatic kag likawan ang armed conflict.
