ILOILO CITY- Padayon pa ang imbestigasyon sang Calinog Municipal Police Station sa ginapahayag abduction nga natabo sa Delgado Street,Calinog, Iloilo.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga base sa panuaron sang mga tawo, may nabatian sila nga may tingog sang babaye nga nagasinggit kag nagapangayo sang tabang pasado las-9:00 sang gab-i sang Hunyo 30.
Suno sa impormasyon, nagbukas ang pwertahan sang pick-up gani nabatian ang pagsinggit sang babaye.
Sang naglakat na ang pick-up, ginsundan ini sang pila ka mga lalaki nga nagsakay sa ila motorsiklo kag sang nagpundo ang pick-up, may naggwa nga lalaki nga may ginauyatan nga binangon.
Sa bahin naman sang kapulisan, ginpahayag ni Dieron nga gilayon man nga naglagas ang patrol sang Calinog Municipal Police Station sang nakabaton sila sang impormasyon nga padulong sa Passi City ang pick-up apang wala man ini naabtan.
Gin-alegar naman sang mga lalaki nga naglagas sa pick-up nga gin-atrasan sila sang salakyan kag liwat nga nagdalagan padulong sa direksyon sang Bingawan.
Ginsundan sa gihapon ini sang mga motorsiklo tubtob sa plaza sang Bingawan apang wala na nila nakit-an ang pick-up.
Sa bahin naman sang Bingawan Municipal Police Station, ginpahayag ni Police Captain Jojo Octavo nga amo ang hepe, nga may report sila nga nabaton tuhoy sa amo nga pick-up apang wala nila ini nakit-an sa ila area.
