Apisar sang klaro nga paglas-ay sa relasyon nanday President Ferdinand Marcos, Jr. kag Vice President Sara Duterte, imbitado gihapon ang bise-presidente nga magtambong sa ikatatlo nga State of the Nation Address (SONA) sang presidente sa Hulyo 22.
Suno kay House Secretary General Reginald Velasco, lakip si Duterte sa 2,000 ka tawo nga nahatagan na sang imbitasyon para sa SONA.
Indi pa kumpirmado kun makatambong ang bise-presidente apang kabahin siya sang traditional invitees kaangay man sa mga nagapamuno sa constitutional commissions kag Cabinet officials. Imbitado man ang former presidents, vice presidents, Senate presidents, kag House speakers.
May inter-agency committee man nga in-charge sa seating arrangement gani indi pa subong sigurado kun tupaday gihapon ang vice president kag si First Lady Liza Marcos kaangay sang SONA sang 2023.
Suno kay Velasco, masobra 2,000 halin sa gobyerno, pribado nga sector, kag non-government organizations ang nagpahayag sang ila interes nga magtambong sa SONA, apang limitado lamang sa 2,000 ang seating capacity sang session hall.
Sa Hulyo 19, iga-lock down na ang Kamara bangud sa security reasons para sa amo nga aktibidad.
