Magabisita sa Pilipinas kag makigkita kay President Ferdinand ‘Bongbong’ Marcos, Jr. kag sa iban pa nga church officials ang isa ka opisyal sang Vatican subong nga semana.
Suno sa Department of Foreign Affairs (DFA), lima ka adlaw ang i-tinir ni Vatican Secretary for Relations with the States of the Holy See Archbishop Paul Richard Gallagher diri sa pungsod kun sa diin lain-lain man nga mga aktibidad ang iya tambungan.
Ang pagbisita ni Archbishop Gallagher amo ang una nga official visit sang Vatican foreign minister sa Pilipinas sa sulod sang 72-ka tuig nga diplomatic relations sa tunga sang duha ka states.
Magapakigkita man ang arsobispo kay Foreign Affairs Secretary Enrique Manalo agud madiskusyunan ang areas of cooperation sa tunga sang Holy See kag Pilipinas kaangay sang higher education, migration governance, interfaith dialogue, kag climate change.
Suno sa Vatican News nga amo ang news portal sang Holy See, magatambong si Archbishop Gallagher sa tuigan nga selebrasyon sang “Pope’s Day” nga amo ang nagamarka sang kapyestahan nanday St. Peter kag St. Paul sa Apostolic Nunciature sa Manila.
Magahambal man si Gallagher sa plenary session sang Catholic Bishops’ Conference of the Philippines (CBCP) sa Malaybalay sa probinsya sang Bukidnon.
Natalana ini nga mag-deliver sang lecture sa “Moral Governance and Ethical Leadership” bilang kabahin sang Mabini Dialogue series sang Foreign Service Institute sang DFA.
