Ginpasalamatan ni Sen. Sonny Angara si Pres. Ferdinand Marcos Jr. sa pagpili sa iya bilang bag-o nga Secretary sang Department of Education (DEPED).
Si Angara amo ang magabulos kay Vice President Sara Duterte nga nag-resign sa pwesto sang Hunyo 19, apang mangin epektibo ini sa Hulyo 19.
Suno kay Angara, nakahanda ini nga batunon ang nasambit nga responsibilidad kag magtrabaho kaupod ang nagkalain-lain nga sector sang sosyudad lakip na ang iya buslan nga si Vice President Duterte.
“This significant responsibility is one I accept with humility and a profound sense of duty,” pahayag ni Angara.
Ginpasigurado man ni Angara nga mahatagan ang tanan nga mga Filipino nga kabataan sang maayo nga kaledad sang edukasyon.
“I am committed to working with all sectors of society, including my predecessor, Vice President Sara Duterte, to ensure that every Filipino child has access to quality education. I look forward to building upon her accomplishments.”
Si Angara ang isa man ka abogado kaangay sang bise presidente.
Nagtapos ini sa University of the Philippines College of Law kag nagkuha sang iya Masters of Laws sa Harvard Law School.
Una ini nga napilian bilang Sentor sang 2023.
Lakip sa mga gin-author sini nga hagna ang nagatutok sa sektor sang edukasyon.
Nangin commissioner man ini sang Second Congressional Commission on Education ukon EDCOM II, nga may katuyuan nga i-address ang problema sa edukasyon.
Bilang EDCOM II commissioner, ginpasalig ni Angara ang maid-id nga pag-review sang K to 12 program.
Sa pagpungko ni Angara, saluon sini ang problema sa sektor sang edukasyon lakip na ang pigado nga performance sang Filipino students sa global education assessments.
Nahibaluan nga nagwa sa report sang World Bank nga 9 sa 10 ka Filipino students nga naga-edad sang 10 ka tuig ang nabudlayan nga magbasa.
