Maga-abanse na ang Gilas Pilipinas sa semifinals sang FIBA Olympic Qualifying Tournament apisar pa nalutos ini sa duha gid lamang ka puntos, 96-94, sa kamot sang World No. 23 nga Georgia.
Si Justin Brownlee ang nagpanguna sa nationals nga may team-high tallies sang 28 points, eight rebounds kag eight assists.
Daku man ang nabulig ni Dwight Ramos (16 points, five rebounds), Chris Newsome (13 points, six assists) kag CJ Perez (14 points).
Antes nabulsa sang World No. 37 nga national team ini nga spot, ginpakahuy-an anay ini sang Georgia paagi sa 16-0 nga lead sa pagbukas sang hampang. Nagtapos ang first quarter sa 28-17 nga skor pabor sa kasumpong.
Gin-antos man sang Gilas ang 20-puntos nga abanse sang pihak, 40-20, sa ikaduha nga quarter kag nadugangan pa bangud sa pagguwa si Kai Sotto matapos ini naigu ni Goga Bitadze sa 6:42 mark sang second frame.
Apisar sang natabo, amat-amat nga nakabangon ang Gilas, 47-41, apang wala na gid nakabalik si Sotto sa sambuwa.
Sa second half, dalayon na nga nabasa sang Gilas ang hampang sang Georgia, ginwaswasan tubtub nga nakuha na gid man ang lead, 71-70, sang halos duha ka minutos na lang ang nabilin sa third period.
Apisar daog ang Georgians, ang Gilas ang maga-abanse sa semis bangud sa ginauyatan sini nga quotient advantage.
Matandaan nga antes ini nga final game sa Group A, ginlutos sang Latvia ang Georgia, samtang gin-upset naman sang Gilas ang World no. 6 nga Latvians, 89-80.
Sulod man sa semis ang Latvians nga amo man ang nagapanguna sa Group A. Pareho sila nga may 1-1 card sang Pilipinas apang mas nauna ini sa board bangud sa higher quotient.
