ILOILO CITY- Narekober sang otoridad sa resort sa Pampanga ang pila ka mga resibo kag dokumento gikan sa kompaniya kag incorporators nga naangot kay Bamban, Tarlac Mayor Alice Guo.
Ini matapos ginbuksan sang otoridad ang 19 ka money vaults sa sulod sang villas sa Fontana Leisure Parks sa Clark Freeport.
Ang villas ang ginarentahan sang mga ginakabig nga “big bosses” sang gin- raid nga Zun Yuan Technology POGO facility sa Bamban kag sang business partners sang suspended mayor.
Sa sini nga vaults yara ang mga bank documents sang Baofu Land Development, ang firm nga ginaalegar nga konektado kay Guo kag tag-iya sang duta kun sa diin nahamtang ang gin- raid nga POGO hub sa Bamban.
Suno kay Gilbert Cruz, Presidential Anti-Organized Crime Commission (PAOCC) executive director, nakorebor man ang mga dokumento sang Chinese fugitive nga si Huang Zhiyang, nga business partner ni Guo.
Pila sa mga dokumento amo ang duha ka Taiwanese passports ni Huang, photocopy sang iban niya nga passports gikan sa iban nga pungsod kag isa ka special retiree’s visa.
Suno sa Presidential Anti-Organized Crime Commission, si Huang ang gwa-sulod sa Pilipinas humalin sang 2012.
Ginalantaw man sang otoridad ang pandemic travel pass nga gin-isyu kay Huang ni former Bamban Mayor Antonio Feliciano.
Nakuha man sa villas ang mga dokumento sang iban nga Baofu incorporators nga sanday Zhang Rujin kag Lin Baoying, nga involved sa money laundering case sa Singapore.
