Ginbatak na sang Philippine Atmospheric, Geophysical, and Astronomical Services Administration (PAGASA) ang monitoring status sini sa La Niña alert bangud sa padayon nga pagtugnaw sang sea surface temperatures (SST) sa central kag eastern Pacific Ocean.
Sandig sa monitoring sang weather bureau, may yara na sang 70% nga tyansa nga magsugod ang La Niña sa August-September-October kag magapadayon tubtub sa una nga quarter sang 2025.
Ang La Niña amo ang indi kinaandan nga kalamig ipaanggid sa average sea surface temperatures sa central kag eastern equatorial Pacific (CEEP). Nagatuga ini sang above-normal rainfall conditions. Magluwas sa pag-inulan, posible man ini nga mag-trigger sang dugang nga mga bagyo.
Nag-abiso man ang PAGASA sa publiko nga maghanda sa pagluntad sang mga baha kag landslides ilabi na sa mga nagapuyo sa vulnerable ukon hazard-prone areas.
Sa subong nagapabilin ang kondisyon sa tropical Pacific sa ENSO-neutral levels. Ang ENSO nagakahulugan nga El Niño Southern Oscillation nga may tatlo ka phases: El Niño, La Niña, kag neutral.
Sang Hunyo sang gindeklarar sang PAGASA nga nagtakop na ang El Niño sa Pilipinas.
