ILOILO CITY- Mas madamo na nga kompaniya sa Japan ang naga-produce sang diapers nga para sa mga tigulang kun ipaanggid sa kabataan, may kaangtanan sa naganubo nga birth rate kag ageing population sang Japan.
Suno kay Bombo Josel Palma, base sa data, ang numero sang mga babies nga ginabun-ag sa Japan ang nagnubo sa walo ka sunod-sunod nga tuig kag kapin 29% sang populasyon ang yara sa edad nga 65 kag nagataas pa.
Suno sa isa ka diaper factory, maathag ang trend subong bangud ang numero sang diapers nga ila gina-produce ang nagataas kada tuig bangud sa nagadako nga market para sa adult diapers.
Sa sulod sang lima ka tuig tubtob sa 2027, ang adult diaper market sa Japan ang ginalantaw nga magtubo sa 16% nga katumbas sang $600 million.
Samtang ang sales sang baby diapers ang nagtibusok sa 8%, ukon katumbas sang $530 million.
May iban naman nga diaper factories ang natalana nga mag-untat sang paghimo sang baby diapers.
