Nagapakig-angot na ang Philippine Statistics Authority (PSA) sa National Bureau of Investigation (NBI) kaangot sa report nga 200 Chinese nationals ang nakaangkon sang falsified birth certificates sa Davao del Sur.
Suno sa ahensya, nakapatigayon na sila sang verification kag nakahatag sang kinahanglanon nga mga impormasyon sa NBI kaangot sa birth records nga ginapadalman subong, samtang na-relieve naman sa pwesto ang civil registrar nga na-link sa isyu.
Ginpasalig man sang PSA ang publiko nga aktuhan nila ini nga problema kag dapat man suno sa ahensya nga i-report dayon sa otoridad kun may makaduluda nga aktibidad sang pagpameke sang mga dokumento.
Matandaan nga sang Martes nadakpan ang isa ka Chinese national nga nagtilaw nga mag-apply para sa Philippine passport gamit ang peke nga birth certificate.
Ini amo si Hengson Lemosnero nga gin-identify man sang NBI bilang si Hanlin Qiu nga isa sa ginatos ka Chinese nationals nga naka-kuha sang falsified birth certificates halin sa municipal civil registry sang Sta. Cruz, Davao del Sur.
Nahibaluan nga sa bahin sang Kamara, nagpasalig ang administration lawmakers nga tukibon sini kun may government officials sa Davao City nga yara sa likod sang gina-alegar nga scheme.
