Nakaistoryahanay na sanday United States President Joe Biden kag si anay Presidente Donald Trump kasunod sang natabo sa rally sa Pennsylvania nga ginkapilas gid sang dulunggan sang Republican presumptive presidential nominee.
Suno kay Biden, nalipay siya nga maayo na subong ang kondisyon sang iya kasumpong kag naga-recover naman kasunod sang amo nga assassination attempt.
Sa iya video statement, liwat nga ginkondena ni Biden ang amo nga krimen kag nagpanawagan man sa Americans nga mag-isa.
“Unity is the most elusive goal of all, but nothing is more important than that right now: unity. We’ll debate and we’ll disagree. That’s not going to change. But we’re not going to lose sight of who we are as Americans,” suno sa presidente.
Ginmandu man sini ang pag-review sang seguridad sa rally kun sa diin napilasan si Trump ilabi na bangud nagaulan ang mga pamangkot kun ngaa nakalusot ang shooter apisar una naman ginpahayag nga hugot man ang seguridad.
“There is no place in America for this kind of violence or any violence for that matter. An assassination attempt is contrary to everything we stand for…as a nation—everything,” dugang sini.
Ginakonsiderar man subong nga i-kansela ang natalana nga pagbisita ni Biden sa Lyndon B. Johnson presidential library sa Austin, Texas kun sa diin natalana siya maghatag sang speech sa landmark Civil Rights Act nga ginpirmahan ni Johnson sang 1960s.
Base sa political strategists, ang shooting ang may daku gid nga epekto sa dalagan sang eleksyon sa USA ilabi na bangud natabo ini sa election battleground state of Pennsylvania kun sa diin nagdaog si Biden batok kay Trump sang 2020.
Matandaan nga sa Butler Country sa Pennsylvania, isa ang patay kag duha ang napilasan bangud sa pagpangluthang sang suspek nga ginkilala nga si Thomas Matthew Crooks, 20-anyos, residente sang Bethel Park sa amo man nga estado.
Sang ulihi, ang amo nga gunman ang napatay man sa kamot sang Secret Service agents.
Base sa satellite images, naka-posisyon ang shooter sang ginabanta 490 ka tapak halin sa stage sang ginhimo sini ang amo nga assassination attempt batok kay Trump.
Nagaguwa sa imbestigasyon nga isa ka kitchen worker ang suspek kag may dala nga AR-style rifle sang ginhimo sini ang krimen.
Base sa state voter records, nakit-an nga isa ini ka rehistrado nga Republican kag gin-report man nga naka-donate sang $15 ukon masobra P800 sa liberal campaign group nga ActBlue sang 2021.
Sandig sa US media reports, sang tion nga ginhimo sini ang krimen, nagasuksok si Crooks sang T-shirt halin sa Demolition Ranch, isa ka YouTube channel nga kilala sa mga content sini kaangot sa mga armas kag explosive devices.
Ginapatihan man sang otoridad nga ang pusil nga gingamit agud tiruhon si Trump ang ginbakal sang amay sang suspek anum ka bulan na ang nagligad.
Pila ka oras matapos ang shooting sa Trump rally, ginpahayag man sang law enforcers nga may nakit-an nga makaduluda nga mga device ukon mga materyales sa paghimo sang bomba nga yara sa salakyan kag balay sang suspek.
Padayon pa subong ang imbestigasyon sang otoridad kun ano gid ang motibo sini kag kun ini ang naangot na sa pulitika.
