Opisyal na nga ginhingadlan si anay Presidente Donald Trump bilang presidential candidate sang Republican party para sa November 2024 presidential elections kun sa diin liwat sini nga maka-atubang ang Democrat kag current president nga si Joe Biden.
Natabo ini sa pagtipon sang Republicans sa isa ka national convention sa Milwaukee sa Wisconsin kun sa diin gin-anunsyo man nga si Ohio Senator JD Vance, 39, amo ang mangin vice presidential runningmate ni Trump.
Nangin kritiko ni Trump si Vance sang 2016 apang makaligad ang tyempo, nagtindog naman ini bilang isa sa staunchest defenders sang anay presidente kag gindampigan pati ang statement sini nga may mga iregularidad sa resulta sang 2020 election.
Ini na ang ikatatlo nga eleksyon nga pangunahan ni Trump ang Republicans kun sa diin nadag-an sini ang pwesto sang 2016 apang nalutos sa kamot ni Biden sang 2020.
Nahibaluan nga binulan na nga ginakabig si Trump nga presumptive nominee, apang ang boto sang mga delegado sa Republican National Convention amo ang naghimo sini nga opisyal nga nominasyon.
Ang pagpili kay Trump ang natabo pila ka adlaw lang matapos nakaluwas ini sa isa ka assassination attempt kadungan sang isa campaign rally sa Pennsylvania kun sa diin napilasan ang iya dulunggan, napatay ang 20-anyos nga shooter, kag napatay man ang isa ka firefighter nga kabahin sang mga nagtambong sa amo nga event.
‘BLOCKBUSTER LEGAL VICTORY’
Samtang, antes ang anunsyo nga si Trump na ang kandidato sang Republicans, ginbasura man sang huwes sa Florida ang classified documents case batok sa iya.
Base sa desisyon ni Judge Aileen Cannon nga naka-base sa Florida kag gin-nominate anay ni Trump, isa ka paglapas sa layi ukon iligal ang pag-appoint kag funding kay Special Counsel Jack Smith nga amo ang nagapanguna sa prosecution.
Ginsaad sang judge nga wala sang otoridad si Smith nga ipasaka ang amo nga kaso, apang wala nakabutang sa desisyon sini kun legal ukon indi ang ginhimo sang anay presidente.
Ginalantaw nga iga-apelar sang prosecutors ang ruling sang federal judge.
Nahibaluan nga sa sini nga documents case, na-indict si Trump bangud sa ginpahayag pag-retain sang sensitibo nga national security documents sa iya Mar-a-Lago social club matapos nga nagbiya na ini sa posisyon bilang presidente sang Estados Unidos sang Amerika kag ginpunggan man sini ang government efforts agud nga makuha kuntani ang amo nga materyales.
Ini nga desisyon sang judge ang makabig nga isa naman ka blockbuster legal victory para kay Trump kasunod man sang ruling sang Supreme Court sang Hulyo 1 kun sa diin ginsaad nga mahimo ma-enjoy sang former president ang immunity from prosecution sa “official acts” sini samtang yara siya sa posisyon.
Ginpaguwa ini nga desisyon kadungan man sang una nga adlaw sang Republican National Convention kun sa diin natalana nga iga-appoint si Trump bilang official candidate sang Republicans para sa 2024 presidential elections.
Sang nagligad nga Sabado sang gab-i (Domingo sang aga sa Pilipinas) ukon isa ka adlaw antes ang convention, napilasan man si Trump sa isa ka assassination attempt sa Pennsylvania kadungan sang iya rally.#
