ILOILO CITY-Nagpaathag ang Department of Trade and Industry may kaangtanan sa pagsaka sa presyo sang school supplies.
Sa interview sang Bombo Radyo kay Grace Benedicto, Chief sang Consumer Protection Division sang Department of Trade and Industry Region 6, iya ginpahayag nga nagmahal ang raw materials nga ginabakal sang manufacturers gani nagpataas man sila sang presyo sang pila ka items.
Ini ginalakipan sang notebook, writing pad, ruler, kag sharpener.
Suno kay Benedicto, nag-improve man ang quality sang iban nga produkto kaangay sang crayons gani nagmahal man ini.
Ginpasiguro naman sang natungdan nga padayon ang ila price monitoring kag nagpaandam sa mga negosyante nga nagapamentaha paagi sa tuman ka pagpataas sang presyo nga mahimo sila mangatubang sang kaso kag dagdagan sang penalidad.
Nagpanugyan man ini sa publiko nga kun mahimo, i-recycle ang iban nga school supplies nga wala pa man maubos gamit kag mag-canvass anay antes magbakal agud makapili kun sa diin ang may pinakabarato nga presyo.
