Ginalantaw nga mabutang sa alang-alang ang relasyon sang Taiwan kag Estados Unidos sang Amerika kun magabalik sa pagpungko sa pwesto si anay Presidente Donald Trump.
Nagguwa ini nga espekulasyon kasunod sang isa ka interview sa Republican presidential candidate sa Bloomberg Businessweek nga ginbalhag sang Martes kun sa diin ginpamangkot si Trump kun depensahan sini ang Taiwan nga gina-claim sang China nga parte pa sang ila teritoryo.
Sabat ni Trump, kilala sini kag gina-respeto ang mga tawo, apang ginsiling sini nga ginkuha sang Taiwan ang 100% sang chip business sang US.
Gindugang man sini nga dapat magbayad ang Taiwan sa sini nga depensa nga ginahatag sang Amerika.
“I know the people very well, respect them greatly. They did take about 100 percent of our chip business. I think, Taiwan should pay us for defense,” pahayag sini base sa transcript nga ginpaguwa sang Bloomberg.
Daw kaangay suno kay Trump nga isa ka insurance company ang Estados Unidos kag wala man sang ginahatag nga bisan ano ang Taiwan sa ila.
“You know, we’re no different than an insurance company. Taiwan doesn’t give us anything.”
Nahibaluan nga ang US amo ang daku nga partner sang Taiwan kag isa man ka major provider sang kinahanglanon sini nga mga hinganiban. Kun matandaan, sang damlag lang, nagpasar ang Washington sang multi-billion-dollar military aid package para mabuligan ang Taiwan nga batuon ang tension dala sang China sa amo nga region.
Isa man ka major powerhouse ang Taiwan sa semiconductor industry nga naga-produce sang majority sang advanced microchips nga kinahanglan agud i-power ang global economy.
Kasunod sini, nagsabat si Taiwanese Premier Cho Jung-tai nga may ginahimo man nga mga tikang ang Taipei agud nga mapataas ang ila defense budget sa sulod na sang pila ka tuig.
“We are willing to take on more responsibility; we are defending ourselves and ensuring our security,” pahayag sini sa press briefing.
Gin-athag man sini nga mapag-on ang relasyon sang Taiwan kag Estados Unidos sa sulod na sang tinuig kag ginakabig suno sa iya nga common responsibility kag goal ang pagpabilin sang kalinong kag stability sa Taiwan Strait kag Indo-Pacific region.
“We are also clear that Taiwan-US relations have been very strong in recent years. Maintaining peace and stability of the Taiwan Strait and Indo-Pacific region is our common responsibility and goal.”
