Gin-activate na sang Philippine National Police (PNP) ang Task Force Manila Shield antes ang pag-deliver ni President Ferdinand Marcos Jr. sang iya nga State of the Nation Address buwas, Hulyo 22.
Ini nga task force ang isa ka kumprehensibo nga security measure para nga punggan ang anuman nga tuyo nga i-disrupt ang major public events sa Metro Manila.
Matapos ang activation sini kagab-i, gin-umpisahan man sang mga pulis ang security operations kaangay sang checkpoints sa sulod kag guwa sang Metro Manila particular sa CALABARZON kag Central Luzon.
Iga-preparar man sang PNP ang ila nga civil disturbance management teams kag elite units kaangay sang Special Action Force.
Nagsugod naman ang gun ban kahapon kag magalawig tubtub sa Lunes kun sa diin sa idalom sini, hugot nga ginadumilian ang sibilyan nga mga tag-iya sang pusil nga magdala sang ila armas sa guwa sang balay.
Kabug-usan nga 23,000 policemen ang magabuligay para sa seguridad sang SONA kun sa diin 6,000 diri ang naka-deploy sa Batasang Pambansa Complex nga amo ang venue sang aktibidad buwas amo man sa Commonwealth Avenue sa Quezon City.
Kaangot diri, nagmandu naman ang Quezon City Government sa pag-suspend sang klase sa tanan nga lebel sa Lunes kadungan sang SONA sang presidente.#
