Mas ginpili ni Vice President Sara Duterte nga magkadto sa haya sang bise gobernador sang Bohol sa baylo nga magtambong sa ikatatlo nga State of the Nation Address (SONA) ni President Ferdinand ‘Bongbong’ Marcos, Jr., Hulyo 22.
Ang nagtaliwan nga si Bohol Vice Governor Dionisio Victor Balite amo ang nagapungko kuntani nga acting governor sang probinsya.
Sa statement sang bise-presidente, ginsiling man sini nga nahatagan siya sang oportunidad nga makapalab-ot sang simpatiya sa pamilya, lokal nga panguluhan sang probinsya, kag tanan nga taga-Bohol nga nasubuan gid sa pagtaliwan sang ila mataas nga opisyal.
“Nabigyan rin ako ng pagkakataong makamusta at makausap ang ilang mga opisyales ng probinsya, munisipalidad, at barangay. Maraming salamat sa inyong mainit na pagtanggap at suporta. Ang pagbisita natin ay pagpapakita ng pakikiisa sa ating mga kababayang Bol-anons upang bigyan sila ng pag-asa sa paggunita nila ng kanilang Bohol Day ngayong araw,” kabahin sang Facebook post ni Duterte.
Ang pagbisita sang vice president ang kadungan man sa Bohol Day ukon ang charter day sang amo nga probinsya.
Antes sini, nauna na nga ginkumpirma ni Sara nga magluwas nga indi siya magkadto sa Batasang Pambansa sa Quezon City para sa SONA bangud gina-appoint niya ang iya kaugalingon bilang ‘designated survivor’, indi man siya mag-monitor sa speech sang presidente bisan sa TV ukon sa gadgets.
Matandaan nga sanday Marcos kag Duterte ang nag-updanay sa UniTeam tandem sang 2022 elections nga amo man ang nagkuha sang suporta sang pinakadalagku nga political parties kag clans sa pungsod.
Sang Hunyo 19, nagpasa si Sara sang iya resignation sa Gabinete ni Marcos kag nangin epektibo sang Hulyo 19 ang iya pagpanaog sa pwesto bilang tiglikom sang Department of Education. #
