ILOILO CITY – Ginhatagan sang manubo nga grado sang economic think tank nga IBON Foundation ang kaundan sang State of the Nation Address (SONA) ni President Ferdinand “Bongbong” Marcos Jr.
Sa interview sang Bombo Radyo Iloilo kay Ibon Foundation Executive Director Sonny Africa, iya ginpahayag nga 1 out of 10 ang grado sini sa SONA sang presidente.
Suno kay Africa, sa pihak sang pagtutok sang presidente sa ekonomiya sa iya SONA, maathag nga hapaw kag indi ini sinsero.
Gindetalye man ni Africa ang pila ka pahayag sang presidente nga wala sang konkreto nga data kag wala sang kamatuuran bangud indi ini mabatyagan sang ordinaryo nga Pilipino.
Ginpahayag sini nga lunsay ’empty promises’ ang SONA.
Para kay Africa, failure ang grado ni Marcos bangud wala ini sang nahimo para sa mga mamumugon kag mangin sa pagbarato sang presyo sang mga serbisyo kag balaklon.
Magluwas diri, wala man sang maayo nga trabaho ang pila ka mga pumuluyo kag may yara man sang wala pa sang trabaho.
Ginpahayag ni Africa nga apisar madamo sang mga pet bills si Marcos nga nangin layi, wala ini nabatyagan sang mga tawo gani wala sang dapat ipabugal sa SONA.
