Ginpanginwala sang Philippine Amusement and Gaming Corporation (PAGCOR) nga nagpaguwa ini sang dokumento nga nagmandu sa Philippine Offshore Gaming Operators (POGOs) nga magpanirado na sang ila mga establisyemento epektibo sa Agusto.
Suno sa ahensya, ginhimo-himo lamang ini nga dokumento sandig sa ila nauna nga memorandum nga gin-isyu pagkatapos sang ikatatlo nga State of the Nation Address (SONA) ni President Ferdinand Marcos Jr.
Suno sa PAGCOR head of Offshore Gaming Licensing Department nga si Atty. Jessa Mariz Fernandez, manipulated version man ini nga dokumento kag gin-anggid-anggid lang sa memo nga ila ginpaguwa sang Hulyo 23.
Ini nga peke nga dokumento ang nagamandu sa local government units sa Metro Manila nga insigidad na nga i-ban ang POGOs sa ila areas kag i-terminate ang POGO operations sa ila hurisdiksyon.
Suno sa ahensya, klaro nga “disinformation” ang natabo nga ginhungod agud magtuga sang gamo kag paglibog sang ulo gani nga pa-imbestigaran ini sa National Bureau of Investigation (NBI). #
