Nagtapos sa draw ang exhibition match sang Filipino boxing legend nga si Manny Pacquiao batok sa Japanese kickboxer nga si Ruyika Anpo nga amo ang main event sa Super RIZIN 3 sa Saitama Super Arena sa Japan.
Wala sang judges sa amo nga exhibition fight apang klaro sa tumalan-aw nga wala sang may maathag nga may upper hand sa tunga sang 45-anyos nga anay eight-division boxing champion kag 28-anyos nga kickboxer.
Pananglitan may nag-dominar ukon may nag-knock out sa sini nga match, diri kuntani kag may nadeklarar nga winner.
Antes ang hampang, ginpaandaman si Anpo nga multahan sang $5 million ukon P292.3-million kun mag-gamit ini sang mga hulag nga indi para sa boksing kaangay sang back fist ukon pagsipa.
Gin-ako man ni Pacquiao nga nangin hangkat sa iya ang height advantage sang kasumpong kag yara lamang sa 60% ang iya kapasidad subong.
Ginpahayag man sang former world champion nga may yara siya sang “real fight” subong nga tuig.
Katapusan nga nakahampang si Pacquiao sang professional fight sang Agusto 2021 kun sa diin ginlutos ini sang Cuban fighter nga si Yordenis Ugas via unanimous decision.
Duha ka tuig na ang nakaligad, nagsabak man ang Pinoy pride sa exhibition bout batok sa Korean martial artist kag video blogger nga si DK Yoo sa Seoul.
Base sa nagaguluwa nga impormasyon, interesado ang Pinoy champ nga atubangon si reigning World Boxing Council welterweight champion Mario Barrios subong nga tuig.
