Gin-ako ni anay presidential spokesperson Harry Roque nga na-istaran niya anay ang balay nga amo ang gin-raid sang otoridad sa Tuba, Benguet kun sa diin duha ka foreign nationals ang nadakpan.
Apang sa atubang sang Senate panel on Women, Huly 29, ginpahayag ni Roque nga wala niya ginapanag-iyahan ang amo nga balay — baliskad sa una nagguwa nga mga impormasyon.
Pahayag sini, rehistrado ang balay sa isa ka korporasyon kag may yara siya sang interest sa korporasyon nga ini.
Ginpaathag sini nga nagtinir siya sa amo nga balay sang naghalin na siya sa trabaho sa gobyerno, apang sang Enero 2024 suno sa natungdan, ginpa-arkilahan ini sang korporasyon sa isa ka Chinese national nga nagahingalan kay Wan Yun.
Sang gin-require ini nga magpirma sang contract of lease suno pa kay Roque, gin-require ini nga magpakita sang alien certificate of registration kag nagaguwa nga ini nga Chinese national ang holder sang 9G working visa nga buot silingon may kinamatarong ini nga magtinir sa Pilipinas.
Ginpahayag man ni Roque nga bangud sa nagguwa nga mga impormasyon nga siya ang tag-iya sang balay, kumbinsido na gid siya nga may yara gid sang gusto nga higkuan ang iya pangalan kasunod man anay sa isyu nga nag-lobby ini para sa iligal nga Philippine Offshore Gaming Operators (POGO) sa Pilipinas.
Nahibaluan nga sa amo nga law enforcement operation sa Tuba, Benguet, ang tuyo kuntani amo nga arestuhon ang Chinese woman nga na-link sa Pogo hub sa Bamban, Tarlac.
Wala nadakpan ang amo nga babaye, apang natigayon nga naaresto sang government agents ang Chinese national nga si Wang Keping, 35, kag ang iya Cambodian nga kaupod nga si Khuon Moeurn, 37.
Sang ulihi, ginklaro ni Senator Risa Hontiveros nga indi Cambodian national ang naaresto sa amo nga balay kundi isa ka pugante nga Chinese. Peke suno sa senadora ang Cambodian passport nga gina-uyatan sang lalaki, kag base sa impormasyon, isa ini ka red notice fugitive, “very” high-level, kag nakapanunto na sa 100,000 ka mga tawo.
Gina-proseso na sang otoridad agud ma-deport ang duha nga subong naka-detain sa pasilidad sang Presidential Anti-Organized Crime Commission.
