Opisyal na nga ginkilala si United States Vice President Kamala Harris bilang 2024 Democratic presidential nominee kag naghimo man sang maragtas bilang una nga Black woman kag una nga Asian-American halin sa major party nga nakakuha sang amo nga designation.
Nabulsa sang bise-presidente ang nominasyon sang Democrats matapos nagsulod na ang mayorya sang boto — at least 2,350 — halin sa mga delegado sang Democratic party isa ka adlaw matapos ang pagbukas sang binotohay.
Nagpatigayon man ang Democratic National Committee sang livestream video nga ginpangunahan sang Biden campaign aides kag DNC chairman Jaime Harrison agud nga markahan ang amo nga importante nga okasyon para sa partido.
Sa masunod nga semana natalana nga opisyal nga batunon ni Harris ang nominasyon bangud kinahanglan anay hulaton ang pagtakop sang virtual voting period sa Lunes.
Ginsiling man sang bise-presidente nga nga ginakalangkagan na sini ang Democratic National Convention nga magasugod sa Agusto 19 sa Chicago.
Nahibaluan nga madasig ang pagsikat sang pangalan ni Harris, 59, bilang standard bearer sang Democrats matapos gin-anunsyo sang 81-anyos nga si President Joe Biden sang Hulyo 21 nga naga-atras na ini sa presidential race batok sa Republican presidential nominee nga si former president Donald Trump.
Antes ang party votes, nakuha na ni Harris ang endorsement sang top leaders sa iya partido lakip si Biden, former President Barack Obama kag former First Lady Michelle Obama, Senate Majority Leader Chuck Schumer, House Minority Leader Hakeem Jeffries, kag former House Speaker Nancy Pelosi.
