Nagpasalig ang Department of Agriculture (DA) nga bastante ang suplay sang karne sang baboy sa Pilipinas apisar sang bag-o nga outbreaks sang African swine fever (ASF) sa apat ka mga lugar sa Batangas.
Suno kay DA Assistant Secretary kag spokesman Arnel de Mesa, wala ini sang daku nga epekto sa suplay sa Metro Manila bangud ang Central Luzon amo man ang ginakabig nga principal pork producer kag supplier.
Base sa latest monitoring sang DA, nagatupa ang presyo sang pork belly sa P320 and P400 per kilo samtang ang pork shoulder naman ang yara sa P285 and P380.
Suno kay De Mesa, nagabaka-baka na subong ang local government units para matapna ang outbreak kag malikawan ang paglapta sang balatian sa iban nga mga lugar.
Ginbasol sang opisyal ang pag-ulan kag pagbaha dala sang Bagyo Carina kag Habagat nga amo ang rason sang pagtuhaw na naman sang amo nga balatian sa baboy bangud primary vector sang virus ang tubig kaangay man anay sa natabo nga pagbaha sa Central Luzon.
Gindugang man sini nga indi madula ang posibilidad nga magpadayon ang outbreaks bangud wala pa sang bakuna nga ginagamit sa Pilipinas.
Nahibaluan nga masami nagakatabo ang outbreaks sa backyard farms, bangud indi kaangay sa commercial farms, wala sang epektibo nga biosecurity measure sa backyard hograising.
